Letra personale e zonjës së parë të SHBA, Melania Trump, dërguar presidentit rus Vladimir Putin për çështjen e sigurisë së fëmijëve është bërë publike.
Letra iu dorëzua Putinit nga presidenti Donald Trump gjatë takimit të tij në Alaska, të premten e kaluar.
Bëhet fjalë për një letër personale që trajtonte situatën e fëmijëve në Ukrainë dhe Rusi, veçanërisht ata që dyshohet se janë të rrëmbyer.
Ukraina ka pretenduar më parë se Rusia ka marrë me forcë dhjetëra mijëra fëmijë nga familjet e tyre dhe i ka çuar në territorin rus. Nga ana tjetër, Moska ka deklaruar se po mbron fëmijët më të cenueshëm nga zona e konfliktit.
“Duke mbrojtur pafajësinë e këtyre fëmijëve, ju do të bëni më shumë sesa t’i shërbeni vetëm Rusisë, ju i shërbeni vetë njerëzimit”, shkroi ajo në letër.
Megjithatë, letra, e cila u shpërnda fillimisht nga Fox News dhe më pas nga Prokurorja e Përgjithshme Pam Bondi, nuk përmend pretendime specifike dhe as nuk përmend Ukrainën me emër.
