Kryeministri izraelit Benjamin Netanyahu ka hapur një valë të re reagimesh me deklaratën se Izraeli po bisedon me disa shtete për një mundësi të zhvendosjes së palestinezëve nga Gaza, njofton Associated Press.
Sipas një zyrtari të lartë izraelit, mes vendeve të përmendura në këto biseda janë Sudani i Jugut, Somaliland, Etiopia, Libi dhe Indonezia.
Si kundërshpërblim, këto vende kërkojnë “kompensim të konsiderueshëm financiar dhe ndërkombëtar”.
Sudani i Jugut dje i quajti raportimet “të pabazuara dhe që nuk pasqyrojnë qëndrimin zyrtar” të shtetit. Qëndrim të ngjashëm më parë dha edhe Somaliland.
Indonezia, nga ana tjetër, njoftoi se mund të pranojë 2,000 palestinezë për trajtim mjekësor, por me kusht që ata të kthehen në Gaza pas shërimit.
“Të gjithë ata që thonë se janë të shqetësuar për palestinezët dhe duan t’u ndihmojnë duhet të hapin dyert e tyre. Pse vijnë dhe na predikojnë?! Hapni dyert tuaja,” deklaroi Netanyahu.
