Zëvendëskryeministri i parë dhe njëherazi lideri politik i Lëvizjes Demokratike, Izet Mexhiti, ka reaguar menjëherë pas lajmit për largimin e Partisë Demokratike Turke nga koalicioni “Fronti Europian”, pjesë e të cilit ishin partitë opozitare në Maqedoninë e Veriut.
Në një postim në rrjetin social Facebook, z. Mexhiti ka theksuar se ky zhvillim tregon qartë krizën e thellë të identitetit politik në radhët e opozitës, si dhe mungesën e një vizioni të qëndrueshëm dhe të sinqertë për të ardhmen e vendit dhe bashkëjetesën ndëretnike.
“Kriza identitare në opozitë po thellohet. Sot, Partia Demokratike e Turqve u largua nga “Fronti Evropian”, duke zbuluar boshllëkun programor dhe faktin se aleancat ndërtohen më shumë mbi llogari frike sesa mbi bindje,” shkroi Mexhiti në profilin e tij zyrtar.
Ai shton se ky largim është vetëm një tregues i qartë se bashkëpunimet politike brenda opozitës janë të brishta, të ndërtuara mbi interesa të ngushta momentale dhe jo mbi parime apo qëndrime të përbashkëta ideologjike.
Z. Mexhiti ka ironizuar me koalicionin opozitar, duke e quajtur atë një “Aleancë Kombëtare për Interes”, dhe jo për vlera, drejtësi apo reforma të mirëfillta që do të shërbenin qytetarëve të Maqedonisë së Veriut.
“Në këtë dritë, ‘koalicioni opozitar’ duket se meriton një emër më realist: ‘Aleanca Kombëtare për Interes’. Urime për ‘parimet’,” përfundoi postimin e tij.
Largimi i Partisë Demokratike Turke nga Fronti Evropian është një ndër zhvillimet më të rëndësishme politike në ditët e fundit, që vjen në një kohë kur vendi po përgatitet për dinamika të reja në skenën parlamentare dhe qeverisëse. Ky largim pritet të ndikojë në ristrukturimin e koalicioneve dhe qartësimin e qëndrimeve të aktorëve politikë, sidomos në raport me drejtimin e ardhshëm të vendit drejt integrimit evropian.
Ndërkohë, reagimi i shpejtë i Izet Mexhitit sinjalizon edhe një forcim të pozicioneve të shumicës aktuale, por edhe një thirrje të nënkuptuar për qytetarët dhe partitë e pakënaqura, që të distancohen nga aleanca të bazuara në kalkulime personale e jo në interesin publik.
Ky zhvillim hap një kapitull të ri në skenën politike maqedonase, ku qartësia ideologjike dhe përfaqësimi i sinqertë i komuniteteve etnike dhe interesave qytetare po bëhet gjithnjë e më i rëndësishëm në sy të publikut dhe faktorit ndërkombëtar.
