Kryetari i Partisë Demokratike Turke (TDP), Zülfikar Zeynula në një intervistë për portalin në gjuhën turke në Maqedoninë e Veriut, TimeBalkan, ka thënë se tashmë ka përfunduar koalicioni me Frontin Evropian. Ai ka shprehur shqetësimin e tij për vokabularin e përdorur nga dy kampet më te fuqishme etnike në vend dhe ka shtuar se subjekti që ai tashmë drejton, do të shikojë interesat e komunitetit turk në vend.
Pyetje: TDP mori pjesë në zgjedhjet e përgjithshme të vitit të kaluar në kuadër të Frontit Evropian, e udhëhequr nga BDI, dhe deputeti Bejxhan Iljaz ende vepron në grupin parlamentar të kësaj aleance. Në opinionin publik thuajse çdo ditë dalin lajme se TDP do t’i bashkohet shumicës qeverisëse. A do të ndryshojë partia juaj koalicionin para zgjedhjeve lokale? A mund të na i shpjegoni arsyet?
Përgjigje: Vendimi ynë për të marrë pjesë në zgjedhjet e vitit 2024 nën ombrellën e Frontit Evropian ishte marrë në përputhje me rrethanat politike të asaj kohe dhe në interes të popullit tonë. Sot jemi në një proces të ri.
Sot, lidhja e aleancave politike me qytetarët po vihet gjithnjë e më shumë në pikëpyetje – ajo matet me rezultate konkrete dhe përfitime reale për njerëzit.
Pyetje: A do të ketë ndryshim të koalicionit?
Përgjigje: Ne nuk kemi qëndrim të mbyllur për këtë çështje. Për ne është me rëndësi që të mbrohen sa më mirë të drejtat dhe interesat e komunitetit turk. Nuk jemi të përkushtuar pas koalicioneve, por pas parimeve.
Në këtë drejtim, procesi i konsultimeve me të gjitha degët tona është duke vazhduar. Dhe nëse është e nevojshme, nuk do të hezitojmë të kërkojmë edhe mendimin e popullit.
