Shkodran Alili, kandidat i pavarur për Kërçovën, ka bërë thirrje deri tek faktori politik shqiptar që ta mbështesin kandidimin e tij për kryetar të komunës së Kërçovës.
Ai kujton se në këtë komunë gara është etnike dhe se kandidati maqedonas gjen mbështetjen e të gjithë partive maqedonase dhe se kështu duhet ta mbështesin atë edhe partitë shqiptare.
“Bëjmë apel deri tek partitë politike se ne jemi të hapur, duam të bisedojmë me ta, kërkojmë mbështetjen e tyre. Pala maqedonase unifikohet rreth kandidatit të tyre. Pra do të kemi një kandidat nga pala maqedonase. Të marrim edhe ne guximin të jemi rreth një kandidature të pavarur.
Ti lejmë inatet politike, dhe të dalim jashtë petkut politik. Për arsye se qyteti i Kërçovës është më shumë se një parti, më shumë se një subjekt politik, dhe bisedohet për ta ndërtuar shtëpinë tonë.
Shfrytëzoj rastin ta lus mërgatën tonë të dashur që si çdoherë ka ditur të bëjë më të mirën për vendlindjen e saj, që të shfrytëzojnë autoritetin e tyre, të bëjnë apele, të ulen, të bashkëbisedojnë me partitë politike, ti bindin ato që të na mbështesin, që të jenë rreth kandidaturës time të pavarur për qytetin e Kërçovës që bashkërisht ta ndërtojmë këtë qytet”, deklaroi Alili.
