Agjencia e Sigurisë Kombëtare (ASK) ka dorëzuar tre njoftime në Prokurorinë Publike kundër një ish-drejtori dhe një grupi të punësuarish për ndjekje të paligjshme të një lideri opozitar dhe disa mediave në periudhën 2019–2024.
Në të njëjtën periudhë, sipas burimeve në ASK, në mënyrë të paligjshme janë ndjekur edhe një prokuror publik, një ish-ministër i qeverisë së atëhershme, si dhe disa gazetarë.
Hetimi i brendshëm i ASK-së, i zhvilluar pas ndryshimit të pushtetit dhe ardhjes së drejtorit të ri, Bojan Hristovski, ka zbuluar se ishin formuar dosje për operacione të drejtuara kundër mediave dhe gazetarëve. Aktiviteti i tyre, sipas konkluzioneve të punonjësve të atëhershëm të agjencisë, ishte vlerësuar si kërcënim me qëllim rrëzimin e qeverisë.
Hetimi i brendshëm gjithashtu ka treguar se janë bërë vonesa të qëllimshme në kontrollet e sigurisë për individë që prisnin certifikata sigurie.
Gjatë periudhës së kontestuar, ASK drejtohej nga Viktor Dimovski dhe Zare Miloshevski.
