Deputetja Saranda Imeri Stafai, ka reaguar me tone të ashpra ndaj deklaratave të fundit të deputetit të BDI-së, Blerim Bexheti, duke e akuzuar atë për hipokrizi dhe përpjekje për të larë duart nga e kaluara politike që, sipas saj, ka dëmtuar interesat e shqiptarëve në Maqedoninë e Veriut.
Në një postim të publikuar sot në rrjetet sociale, Imeri-Stafai ka thumbuar Bexhetin për, siç e quan ajo, rolin e tij aktiv në disa nga veprimet më të dëmshme të BDI-së në dekadën e fundit, për të cilat – sipas saj – tani përpiqet të mos mbajë përgjegjësi.
“Blerim Bexheti sot flet sikur s’ka qenë kurrë pjesë e keqbëmave të BDI-së. Por shqiptarët nuk harrojnë: ulje të censuzit për presidentin që të mos vlejë vota e tyre, reforma zgjedhore për ta bërë BDI-në fituese me çdo kusht, mbi 200 ligje të kaluara pa asnjë debat, dhe shtyrje pa fund të ndarjes territoriale që shkelte Marrëveshjen e Ohrit,” shkruan deputetja.
Sipas saj, Bexheti tani përpiqet të paraqitet si i pastër dhe jashtë vendimeve të mëparshme të partisë së tij, por historia dhe faktet nuk mund të fshihen lehtë.
“Sot Blerimi e luan të pafajshmin… po historia ia kujton mirë rolin e tij,” përfundon postimin e saj Imeri-Stafai.
Ky reagim vjen në një klimë të tensionuar politike, ku partitë shqiptare janë në fazën e ripozicionimit për zgjedhjet e ardhshme lokale dhe parlamentare. Deputetja e njohur për tonin kritik ndaj BDI-së, e ka akuzuar shpesh këtë subjekt për kapje të shtetit, mungesë transparence dhe pazare politike në kurriz të shqiptarëve.
Nga ana e tij, Blerim Bexheti nuk ka reaguar ende ndaj këtij sulmi të drejtpërdrejtë, por pritet që tema të vazhdojë të përbëjë temë përplasjesh në ditët në vijim, ndërsa fushata politike sa vjen e intensifikohet.
