Në një shenjë të kulturës demokratike dhe respektit të ndërsjellë, kandidatja për kryetare të Komunës së Karposhit nga LSDM, Maja Mojsova, është takuar sot me kundërkandidatin e saj nga radhët e VMRO-DPMNE, Sotir Lukrovski.
Përmes një deklarate publike, Mojsova ka theksuar se si në jetë ashtu edhe në politikë, udhëhiqet nga dinjiteti dhe ndershmëria, dhe se në këtë frymë do të zhvillojë edhe fushatën për zgjedhjet lokale të vjeshtës.
“Si njeri që gjithmonë jam udhëhequr nga sjellja e ndershme dhe dinjitoze, po ashtu edhe si kandidate për kryetare të Komunës së Karposhit, zotohem publikisht për një garë të ndershme, korrekte dhe të respektueshme me të gjithë pjesëmarrësit në zgjedhje,” tha Mojsova.
Gjatë takimit, të dy kandidatët kanë biseduar për periudhën që i pret dhe kanë shprehur gatishmëri për një proces zgjedhor të qetë, ku do të dominojë programi dhe ideja, e jo fyerjet dhe ndarjet.
Ky takim vjen si një shembull pozitiv në skenën politike, në të cilën shpeshherë fushatat karakterizohen nga tensione dhe polarizim.
Zgjedhjet lokale për komunën e Karposhit pritet të jenë ndër më interesantet, me përballje të fortë mes kandidatëve të dy blloqeve kryesore politike.
