Zëvendëskryeministri Izet Mexhiti njoftoi sot nënshkrimin e kontratës për furnizimin me pajisje moderne për deponinë e Rusinos, në kuadër të një investimi me vlerë mbi 1.1 milion euro. Projekti është mbështetur nga Banka Evropiane për Rindërtim dhe Zhvillim (BERZH), qeveria zvicerane, WBIF dhe SIDA.
Deponia Rusino shërben si pika kryesore për grumbullimin e mbeturinave nga nëntë komuna të rajonit të Pollogut. Rritja e kapaciteteve teknike në këtë deponi vlerësohet si një hap i rëndësishëm drejt përmirësimit të sistemit të menaxhimit të mbeturinave në rajon.
Investimi përfshin blerjen e ngjeshësve, ngarkuesve, traktorëve, kamionëve dhe pajisjeve të tjera të nevojshme për funksionimin e deponisë sipas standardeve evropiane.
Qëllimi i projektit është përmirësimi i efikasitetit në trajtimin e mbetjeve, mbrojtja e mjedisit dhe rritja e sigurisë shëndetësore për banorët e zonës.
