Në këtë vendbanim periferik ka nisur zbatimi i një projekti të rëndësishëm infrastrukturor, i cili pritet të sjellë përfitime të mëdha për banorët dhe për mjedisin. Fjala është për ndërtimin e rrjetit të kanalizimit për ujërat e zeza, një investim prej mbi 6.7 milionë denarësh, i realizuar me përkushtimin e zv/kryeministrit të parë dhe ministrit të Ekologjisë dhe Planifikimit Hapësinor, Izet Mexhiti.
Ministri Mexhiti, përmes një njoftimi publik, theksoi rëndësinë e këtij projekti, duke e konsideruar si një hap konkret drejt zhvillimit të zonave që për një kohë të gjatë kanë qenë të lëna pas dore.
“Po e sjellim zhvillimin aty ku për vite është harruar,” – deklaroi ai, duke nënvizuar se kjo është vetëm një pjesë e një plani të gjerë transformues, që përfshin çdo lagje e fshat të vendit.
Ndërtimi i rrjetit të kanalizimit në Moranë është një investim me ndikim të drejtpërdrejtë në përmirësimin e kushteve jetësore, duke garantuar standarde më të larta higjieno-sanitare dhe mbrojtje më efikase të mjedisit dhe burimeve ujore në zonë.
“Askush nuk duhet të mbetet pas,” – u shpreh Izet Mexhiti, duke theksuar përkushtimin e tij për të vazhduar me projekte të ngjashme, veçanërisht në rajonet që kanë qenë të anashkaluara për dekada.
Ky projekt nuk është vetëm një investim në infrastrukturë, por një sinjal i qartë se zhvillimi i barabartë dhe i qëndrueshëm po bëhet realitet në të gjitha komunat, pa përjashtim. Banorët e Moranës dhe të gjithë komunës së Studeniçanit tashmë po shohin rezultate konkrete të një politike zhvillimore me fokus tek qytetari.
