Zëdhënësi i Federatës së Futbollit Iranian, Amir Mahdi Alavi, në një deklaratë për transmetuesin shtetëror tha se dy persona janë arrestuar për aktivitetet e tyre të lidhura me magjinë, transmeton Anadolu.
“Dy persona që treguan se kishin kontaktuar një magjistar u arrestuan” tha Alavi.
Duke theksuar se më shumë se 50 persona u thirrën për të dëshmuar në lidhje me rastin “magji në futboll”, Alavi theksoi se këto incidente nuk duhet të lejohen të ndikojnë negativisht në emocionet e futbollit në vend.
Kohë më parë, mediat iraniane raportuan se katër trajnerë futbolli u pezulluan nga puna për shkak të aktiviteteve të tyre që lidhen me magjinë.
Në vitet e fundit, disa trajnerë dhe futbollistë në vend kanë pretenduar se në fusha gjatë disa ndeshjeve është vendosur magji dhe se disa ekipe kanë nënshkruar kontrata vjetore me magjistarë.
