Kandidati i koalicionit VLEN për kryetar të Komunës së Bërvenicës, Haqim Ramadani, e ka nisur fushatën e tij me një mesazh të qartë: programi që do t’i ofrohet qytetarëve nuk do të jetë një listë premtimesh të shkruara pas tavolinës në një zyrë, por do të vijë nga vetë banorët, nga problemet e tyre reale dhe nevojat e përditshme.
Këtë qasje ai e dëshmoi gjatë një takimi të mbajtur në fshatin Gurgunicë, ku u takua me banorët dhe dëgjoi nga afër shqetësimet dhe prioritetet që ata ngritën.
“Sot isha në fshatin Gurgunicë ku dëgjova nga afër hallet dhe prioritetet e banorëve. Programi im nuk do të shkruhet në zyre, por nga vetë qytetarët – nga nevojat e tyre të përditshme. Vetëm kështu mund të ndërtojmë zgjidhje reale dhe zhvillim për të gjithë,” u shpreh Ramadani.
Banorët e fshatit theksuan mungesën e investimeve në infrastrukturë, përmirësimin e kushteve për bujqësi si dhe përkujdesjen më të madhe institucionale për jetën e përditshme të tyre. Ramadani u zotua se këto çështje do të përfshihen si prioritete në programin e tij.
Sipas tij, ky takim ishte vetëm fillimi i një serie takimesh që do të zhvillohen në të gjitha vendbanimet e Komunës së Bërvenicës, me qëllim që secili qytetar të ndjehet pjesë e vendimmarrjes dhe planeve zhvillimore.
“Vetëm duke i dëgjuar qytetarët mund të krijojmë një udhëheqje të drejtë dhe një program të vërtetë. Ata e dinë më mirë se kushdo tjetër se cilat janë hallet dhe prioritetet e tyre. Unë do të jem zëri i tyre,” shtoi Ramadani.
Takimi në Gurgunicë u zhvillua në një atmosferë të ngrohtë, ku banorët shprehën pritshmëritë e tyre për ndryshim dhe një qeverisje komunale më afër qytetarëve.
