Koalicioni opozitar shqiptar VLEN ka zyrtarizuar emrin e Haqim Ramadanit si kandidat për kryetar të komunës së Bërvenicës në zgjedhjet lokale që do të mbahen në nëntor të këtij viti.
Burime brenda koalicionit bëjnë të ditur për agjencinë INA se vendimi për kandidaturën e Ramadanit është marrë pas një takimi të rëndësishëm mes liderëve të partive përbërëse të VLEN-it, ku është bërë ndarja përfundimtare e kandidatëve në komunat kryesore shqiptare.
Haqim Ramadani, një emër i njohur në skenën politike lokale, pritet të sjellë një frymë të re në menaxhimin e komunës së Bërvenicës, me synim rritjen e transparencës, zhvillimit rural dhe përmirësimit të infrastrukturës lokale. Ai vjen me mbështetje të gjerë nga strukturat lokale dhe qytetarët, duke u parë si një alternativë e fuqishme për drejtimin e komunës.
Koalicioni VLEN pritet që së shpejti të nisë fushatën zyrtare me prezantimin e platformës dhe prioriteteve për çdo komunë, përfshirë edhe Bërvenicën, ku Ramadani do të garojë me moton e ndryshimit dhe shërbimit qytetar.
