Kandidati për kryetar të Çairit, Bujar Osmani, reagoi ashpër ndaj deklaratës së fundit të kryetarit të Kumanovës, Maksim Dimitrievski, i cili përsëri e sulmoi parimin e shumicës së Badenterit, një nga elementët kyç të Marrëveshjes Kornizë të Ohrit.
Sipas Osmanit, qëndrime të tilla janë pjesë e një strategjie të përgatitur prej kohësh, që ka për qëllim anulimin e marrëveshjes që garanton multietnicitetin dhe stabilitetin e shtetit.
“Mendoj se kjo është një strategji që tashmë e kemi parë. Plani për anulimin e Marrëveshjes Kornizë ekziston prej kohësh. Vetëm se atëherë nuk mund ta realizonin – u duhej një partner shqiptar që do t’u jepte legjitimitet para popullit dhe ndërkombëtarëve. Tani e gjetën”, paralajmëroi Osmani.
Ai theksoi qartë se goditja ndaj Balancuesit, sistemit që siguron përfaqësim të drejtë etnik në institucione, më së shumti do t’i godasë pikërisht qytetarët maqedonas në Çair.
“Maqedonasit në Çair kanë qenë më të mbrojturit pikërisht nga Balancuesi. Falë tij, komuna ka qenë e detyruar t’i punësojë edhe ata sipas numrit. Dhe ata më thonë: kjo është goditje e drejtpërdrejtë ndaj sigurisë së tyre”.
Sipas Osmanit, Balancuesi nuk është privilegj, por një sistem i drejtë që mundëson barazi për të gjithë – për shqiptarët, maqedonasit, romët dhe komunitetet e tjera.
Për këtë arsye, shfuqizimi i tij nuk është në interes të asnjë grupi etnik, por përfaqëson një “projekt kundër shtetit” që synon të minojë bashkëjetesën.
“Kjo nuk është interes shqiptar apo maqedonas. Ky është interes kundër shtetit”, përfundoi Osmani.
