Bashkimi Demokratik për Integrim ka bërë një hap të rëndësishëm në përgatitjet për zgjedhjet lokale të këtij viti duke emëruar zyrtarisht Blerim Osmanin si Shef të Shtabit Zgjedhor të BDI-së në Tetovë.
Ky vendim u miratua nga strukturat drejtuese të degës së BDI-së në qytetin e Tetovës, me konsensus të plotë dhe mbështetje të fuqishme nga baza partiake dhe lidershipi qendror.
Blerim Osmani, një kuadër me përvojë të gjatë politike dhe organizative brenda BDI-së, është konsideruar si figura e duhur për të udhëhequr fushatën zgjedhore në një nga komunat më të rëndësishme për këtë subjekt politik.
Angazhimi i tij në funksione të ndryshme partiake dhe institucionale e bën atë një emër të njohur dhe të respektuar në opinionin publik tetovar, por edhe më gjerë.
Burime nga brenda BDI-së bëjnë të ditur se përzgjedhja e tij nuk ka qenë rastësore – ai është parë si njeriu i duhur për të siguruar një mobilizim të gjerë të elektoratit, duke reflektuar unitet brenda strukturave të partisë, por edhe hapje ndaj shoqërisë civile, të rinjve dhe profesionistëve të pavarur që duan të jenë pjesë e ndryshimit.
