Kryetari aktual i Komunës së Bogovinës dhe kandidati i BDI-së për një mandat të ri, Besnik Emshiu, ka njoftuar sot për nisjen e pastrimit të një deponie të egër në fshatin Kamjan, një ndër vendet më të prekura nga ndotja e mbeturinave inerte dhe shtëpiake në këtë komunë.
Në një postim publik, Emshiu theksoi rëndësinë që ky aksion ka për ambientin dhe shëndetin publik të banorëve, duke bërë thirrje për ndërgjegjësim dhe përgjegjësi qytetare.
“Pastrimi i deponisë në Kamjan është një hap konkret drejt një ambienti më të pastër dhe më të shëndetshëm për të gjithë ne. Apelojmë me gjithë zemër te banorët e zonës dhe gjithë qytetarët që të mos hedhin më mbeturina në vende të palejuara. Ambienti është shtëpia jonë e përbashkët, dhe ta ruajmë atë është detyrë e secilit prej nesh”, theksoi Emshiu.
Ai u zotua se pastrimi i deponive të egra do të vazhdojë në të gjithë territorin e komunës, dhe se në mandatin e ardhshëm do të ndërmerren hapa për të vendosur sistem më të fortë kontrolli dhe edukimi në lidhje me mbeturinat dhe mbrojtjen e mjedisit.
“Kamjani dhe çdo vendbanim tjetër në komunën tonë meriton të jetojë në një ambient të pastër dhe të sigurt. Prandaj, jo vetëm që po pastrojmë, por edhe do të investojmë në ngritjen e kulturës ekologjike dhe vetëdijes qytetare”, shtoi ai.
Në fund, Emshiu falënderoi të gjithë punëtorët komunalë dhe banorët që po kontribuojnë në pastrimin dhe mirëmbajtjen e hapësirave publike, duke nënvizuar se vetëm përmes bashkëpunimit mund të ndërtohet një komunë më e pastër dhe më e jetueshme për brezat e sotëm dhe të ardhshëm.
