Lëvizja Vetëvendosje dhe Nisma Socialdemokrate kanë arritur një marrëveshje politike që pritet të riformësojë balancat e pushtetit në Kosovë. Burime të afërta me të dy partitë konfirmojnë se është arritur pajtueshmëri për bashkëqeverisje, në kuadër të një marrëveshjeje e cila përfshin pozicionet kyçe shtetërore.
Me marrëveshjen e re, Albin Kurti do të vazhdojë të ushtrojë detyrën e kryeministrit të vendit, duke siguruar vazhdimësinë e programit qeverisës të Vetëvendosjes. Nga ana tjetër, Fatmir Limaj, lideri i Nismës Socialdemokrate, do të rikthehet në ekzekutiv si Ministër i Punëve të Brendshme – një dikaster me peshë të madhe në strukturën shtetërore.
Ndërkohë, në krye të Kuvendit të Kosovës do të ngjitet Albulena Haxhiu, një prej figurave të njohura të Lëvizjes Vetëvendosje dhe ish-ministre e Drejtësisë. Ajo do të marrë drejtimin e legjislativit pas një marrëveshjeje që parashikon riformatim institucional në përputhje me balancat e reja politike.
Glauk Konjufca, i cili ka mbajtur më parë poste të rëndësishme në Kuvend dhe në ekzekutiv, pritet të emërohet Ministër i Punëve të Jashtme, duke u rikthyer në një nga pozicionet kyçe në politikën e jashtme të vendit.
Si pjesë e marrëveshjes, Fatmir Limaj do të lëshojë mandatin e tij si deputet, ndërsa në vend të tij në Kuvend do të hyjë Vesel Krasniqi, një përfaqësues i Nismës me përvojë në politikën parlamentare.
Ky zhvillim i fundit shihet si një hap i rëndësishëm drejt krijimit të një shumice të re stabile në Kuvendin e Kosovës dhe si një përpjekje për të garantuar vazhdimësinë institucionale në një klimë të brishtë politike.
