Detaje të reja janë zbardhur lidhur me aksidentin e rëndë rrugor që ndodhi mbrëmjen e së dielës në aksin Delvinë–Sarandë, ku dy motra të reja, Elvisa dhe Rozina Dhimaku, 22 dhe 20 vjeçe, humbën jetën në vendngjarje.
Ato po udhëtonin nga Delvina në drejtim të Sarandës, kur automjeti i tyre u përplas kokë më kokë me një mjet tip Audi, i drejtuar nga Kevin Nora, 23 vjeç.
Sipas policisë, i riu që po udhëtonte nga Saranda në drejtim të Gjirokastrës ka rezultuar nën efektin e alkoolit, në masën 1.52 mg/l në momentin e aksidentit. Ai u arrestua menjëherë dhe referuar burimeve ai ka tentuar të parakalojë me shpejtësi një tjetër automjet, duke dalë në korsinë e kundërt ku ndodheshin vajzat, dhe si pasojë është përplasur direkt me mjetin e tyre tip “Lancia”.
Përplasja ka qenë e fuqishme dhe fatale, duke lënë të pajetë motrat Dhimaku në vend, ndërsa pasagjerja e tretë në makinë, Antonela Zhupa, 24 vjeçe, u dërgua fillimisht në spitalin e Sarandës dhe më pas në Spitalin e Traumës në Tiranë, ku ndodhet jashtë rrezikut për jetën.
Njoftimi i policisë Sarandë:
Specialistët e Seksionit të Trafikut Urban dhe Interurban Sarandë arrestuan në flagrancë shtetasin K. N., 23 vjeç, banues në Fier, për veprat penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”. Ky shtetas, më datë 24.08.2025, rreth orës 20:15, në aksin rrugor Delvinë-Sarandë, duke drejtuar automjetin tip “Audi”, në gjendje të dehur (nga verifikimet e kryera në vendngjarje ka rezultuar: testi i parë i alkoolit në masën 1.52 mg/l, ndërsa testi i dytë në masën 1.42 mg/l), është përplasur me automjetin tip “Lancia”, me drejtuese shtetasen E. Dh., 22 vjeçe. Si pasojë e aksidentit, humbën jetën shtetaset E. Dh., 22 vjeçe dhe R. Dh., 20 vjeçe, ndërsa shtetasja A. Zh., 24 vjeçe, mbeti e dëmtuar rëndë dhe ndodhet nën kujdesin e mjekëve.
