Eros Grezda, ish-futbollist i Osijekut dhe Rangersit, ka konfirmuar se ka përfunduar karrierën si futbollist. Edhe pse është tërhequr që vitin e kaluar, ai nuk e kishte bërë publike deri më tani. Në një deklaratë të fundit për media, ai tregon se tashmë ka kaluar në një tjetër rol: atë të menaxherit të lojtarëve.
“Kam pasur katër operacione në kyçin e këmbës, ishte shumë për t’u rikuperuar dhe për të vazhduar në atë nivel,” – u shpreh Grezda, duke shtuar se ka një peng të madh nga karriera, por pa e specifikuar qartë se për çfarë bëhet fjalë.
Sot, ai është agjent futbolli, dhe një nga lëvizjet më të fundit në karrierën e tij të re është transferimi i lojtarit Raci në Hajduk Split.
Grezda në Air Albania për sfidën e Dinamo City
Në sfidën e kualifikimeve për Conference League, skuadra shqiptare Dinamo City surprizoi opinionin sportiv duke eliminuar Hajdukun e Splitit, një nga klubet më të njohura në Kroaci. Ndeshja e kthimit u zhvillua në stadiumin “Air Albania” në Tiranë, ku Dinamo fitoi 3-1 pas kohës shtesë dhe siguroi kalimin në fazën tjetër.
Nga tribuna ndeshjen e ndoqi edhe Eros Grezda (30 vjeç), i cili tashmë duket i përfshirë në prapaskenat e futbollit, në rolin e menaxherit dhe skautit të lojtarëve.
